အသက်ရှည်ရှည်သာနေရမယ်ဆိုရင်ဒေါ့ဖျင့်

အသက်ရှည်ရှည်နေရမယ်ဆိုတာ ဘယ်နနှစ်အထိလဲ။ လူတစ်ယောက်ပျမ်းမျှသက်တန်းကဘယ်လောက်လဲဆိုတာ ရှာကြည့်တယ်။ ကမ္ဘာမှာတော့ ပျမ်းမျှ ၇၀ ကျော်ဖြစ်ပေမဲ့ မြန်မာနိုင်ငံမှာတော့ ၆၅ နှစ်ဝန်းကျင်ပဲ။ ကင်ဆာအဖြစ်များဆုံးနိုင်ငံတစ်ခုအတွက် ၆၅ နှစ်ဆိုတာ များတောင်များနေသေးတယ်။ အသက်ရှည်ရှည်ဆိုတာ programmatically ပြောမယ်ဆိုရင်တော့ > 65 ပေါ့။

ဒီတိုင်းသွားရင် ၆၅ နှစ်အထိနေရပါ့မလား စဉ်းစားမိတယ်။ အိပ်ချိန်မမှန်စားချိန်မမှန် ကွန်ပျူတာရှေ့အနေများနေတာ lifestyle မပြောင်းရင်တော့ ၆၅ အထိတောင်မခံလောက်ဘူး။ လူချစ်လူခင်ကလဲများတယ်ဆိုတော့ လူငယ်သဘာဝ ကြည့်မရလို့ဆိုပြီး လုပ်ကြံခံရနိုင်သေးတယ်။

ပတ်ဝန်းကျင်က အသက် ၆၀ ကျော် အဘိုးကြီးတွေကို ကြည့်ပြီး ငါသာလူတို့အရွယ်လောက်ရောက်ရင် ဘာဖြစ်နေမှာလဲတွေးမိတယ်။ စိတ်ကူးပေါက်လို့ မနက်စောစော လမ်းလျှောက်ဖြစ်ရင် လမ်းလျှောက်နေတဲ့ ကျန်းကျန်းမာမာ အဘိုးကြီးတွေ အုပ်လိုက်တွေ့တယ်။ ပျော်ပျော်ရွှင်ရွှင်ပဲ။ သူငယ်ချင်းတွေထင်ပါရဲ့ ဘယ်အရွယ်ထဲကပေါင်းလဲတော့မသိဘူး။ သူတို့ကိုကြည့်ပြီး ငါသာ အသက်ကြီးလို့မသေခဲ့ရင် သူငယ်ချင်းတွေပါရှိနေစေချင်သေးတယ် ဆိုပြီး တွေးမိပြန်တယ်။

အသက်ကြီးပဲအလုပ်လုပ်နိုင်သေးတဲ့ သူတွေကိုလဲတွေ့တယ်။ ပြင်ဦးလွင် feel မှာဆို manager အဆင့်လောက်ရှိမလားမသိဘူး အသက်ကြီးကြီးအရပ်ရှည်ရှည်လူတစ်ယောက်ရှိတယ်။ feel နှစ်ဆိုင်လုံးမှာ လုပ်တယ်။ အရပ်ရှည်ရှည်နဲ့ သွက်သွက်လက်လက်ဖြတ်ဖြတ်လပ်လပ်ရှိတုန်းပဲ။ မန်နေဂျာဆိုပြီးထိုင်နေတာမျိုးမဟုတ်ဘူး စာပွဲခုံသုတ်စရာရှိလဲသုတ်လိုက်တာပဲ waiter လုပ်ရင်လဲ လုပ်လိုက်တာပဲ။ စစ်သားဟောင်းလားမသိဘူး။ အဲ့လိုမျိုးလဲဖြစ်ချင်တယ်။

နောက်အသက်ကြီးပြီးအလုပ်လုပ်နိုင်တာရှိသေးတယ်။ သားသမီးကမထောက်ပံ့လို့ပဲဖြစ်ဖြစ် အကြောင်းကြောင်းကြောင့် တုန်တုန်ချိချိနဲ့ပိုက်ဆံရှာရတဲ့အဘိုးကြီးတွေလဲတွေ့ဘူးတယ်။ သူတို့လုပ်ချင်မလုပ်ချင်တော့မသိဘူး။ ဘေးကကြည့်ရတာ မသက်သာလှဘူး။ အဲ့လိုမျိုးလဲမဖြစ်ချင်ဘူး။ အသက်ကြီးလာလို့ အလုပ်မလုပ်နိုင်ရင်တောင် စာလေးဖတ်လိုက် ရေးလိုက် အေးဆေးနားချင်တယ်။

နောက်ဆုံတစ်မျိုးကတော့ အဆိုးဆုံးပဲ။ ပိုက်ဆံရှိရှိ မရှိရှိ ရောဂါအမျိုးမျိုးကြောင့် ကုတင်ပေါ်တစ်ချိန်လုံးလှဲနေရတာမျိုး။ ဘာမှလဲမလုပ်နိုင်ပဲ သေမဲ့နေ့ကိုစောင့်နေရတာမျိုး။ အဲ့ဒါမျိုးတော့မဖြစ်ချင်ဘူး။ အိပ်နေတုန်း အသက်ထွက်သွားတာမျိုးနဲ့ မြန်မြန်ဆန်ဆန်အသက်ထွက်သွားချင်တယ်။ ဆေးရုံတစ်ခါတစ်လေသွားရတာမျိုးက ကိစ္စမရှိပေမဲ့ တစ်ချိန်လုံးမနေနိုင်ဘူး။

အသက်ရှည်ရှည်နေရဖို့ အထူးတလည်မမျှော်လင့်ပဲ အကယ်၍များ အသက်ရှည်ရှည်နေရမယ်ဆိုရင်တော့ဖြင့် သူငယ်ချင်းတွေနဲ့ အေးအေးဆေးဆေး၊ ဒါမှမဟုတ် ဖြတ်ဖြတ်လတ်လတ် အလုပ်လုပ်နေပြီး ဒါမှမဟုတ် ငြိမ်းငြိမ်းချမ်းချမ်း စာဖတ်လိုက်ရေးလိုက်သာ နေချင်တယ်။

Mobile App Developer from Burma

Mobile App Developer from Burma